ಸಹಜವಾಗಿ ಎಲ್ಲರೂ ಒಂದು ಕ್ಷಣ ಸುಂದರಿಯರನ್ನು ಕಂಡರೆ ದೃಷ್ಟಿ ಹರಿಸುತ್ತಾರಾ...? ಎಲ್ಲರೂ ಹೀಗೇ ಮಾಡ್ತಾರಾ...? ನನಗೆ ಗೊತ್ತಿಲ್ಲ. ಆದರೆ ಅವನು ಹದಿನಾರರ ರಾಹುಲ್ ಎಂಬ ಹುಡುಗನಿರಲಿ ಅಥವಾ ಅರವತ್ತರ ರಿಟೈರ್ ಮಹಾದೇವ ಸ್ವಾಮಿಯೇ ಇರಲಿ. ಖಂಡಿತಕ್ಕೂ ಗಂಡು ಮನಸ್ಸು ಒಂದು ಕ್ಷಣ ಕಣ್ಣರಳಿಸುತ್ತದೆ ಎನ್ನುವುದರಲ್ಲಿ ಎರಡು ಮಾತಿಲ್ಲ. ಅಸಲಿಗೆ ಇದನ್ನು ಓದಿದವರು ಎದುರಿಗೆ ಎಷ್ಟೇ ನಿರಾಕರಿಸಲಿ ಮನಸ್ಸಿನಲ್ಲಿ ಮಾತ್ರ ಅದನ್ನು ಒಪ್ಪಿಕೊಳ್ಳಲೇಬೇಕು. ಅಷ್ಟಕ್ಕೂ ಇಲ್ಲವೆನ್ನೋದಾದರೆ ಕೊಂಚ ಮಾತ್ರದ ನಿಜಾಯಿತಿ ಅನ್ನೋದು ಕೂಡಾ ಈ ಲೋಕದಿಂದ ಹೊರಟು ಹೋಗಿದೆ ಎಂದೇ ಅರ್ಥ. ( ಬಟ್ಟೆಯಂತೆ ಗರ್ಲ್‌ಫ್ರೆಂಡ್ಸ್‌ನ್ನು ಬದಲಾಯಿಸುವವರಿಗೆ ಇದು ಅನ್ವಯವಾಗುವುದಿಲ್ಲ )
ಹಾಗಿದ್ರೆ ಸ್ತ್ರೀಯರು ನೋಡೋದೇ ಇಲ್ಲವಾ ? ನೋಡ್ತಾರೆ. ಅವರೂ ಕೂಡಾ ನಮ್ಮ ನಿಮ್ಮಂತೆ ಒಮ್ಮೆ ಕನಿಷ್ಟ ಒಂದು ಸುತ್ತನ್ನಾದರೂ ಕಣ್ಣರಳಿಸಿರುತ್ತಾರೆ. ಆದರೆ ಖಂಡಿತಾ ನಮ್ಮ ಮತ್ತು ಅವರ ನೋಟದಲ್ಲಿ ಒಂದು ಅಗಾಧವಾದ ವ್ಯತ್ಯಾಸ ಇದ್ದೇ ಇದೆ. ಯಾಕೆಂದರೆ ಒಂದು ಹೆಣ್ಣು ನಮ್ಮನ್ನು ನೋಡಿದ ಮಾತ್ರಕ್ಕೆ ಅದರಲ್ಲಿ ಒಂದು ಅದಮ್ಯ ವಾಂಛೆ ಇದೆ ಎಂದರ್ಥವಲ್ಲ. ಆ ಕೂಡಲೇ ಆಕೆ ನಿಮ್ಮನ್ನು ಬಯಸುತ್ತಿದ್ದಾಳೆ ಎಂದರ್ಥವಲ್ಲ. ಆದರೆ ನಮಗರ್ಥವಾಗೋದೆ ಅದು. ಯಾಕೆಂದರೆ ನಾವು ನೋಡುವ ದೃಷ್ಟಿಯಲ್ಲಿ ಬರಿ ಆಸೆಯ ಗೋಪುರಗಳೇ ಇವೆ. ಅಕಸ್ಮಾತ ಕಾಲೇಜು ಹುಡುಗನೊಬ್ಬನನ್ನು ಒಂದು ಹುಡುಗಿ ಎರಡ್ಮೂರು ಬಾರಿ ತಿರುಗಿ ನೋಡಿದಳೆಂದಿಟ್ಟುಕೊಳ್ಳಿ. ಅದೆಷ್ಟು ವ್ಯವಸ್ಥಿತವಾಗಿ ಅವನ ದಿನಚರಿ ಬದಲಾಗುತ್ತದೆ ಎಂದರೆ ದಿನಾಲು ಮೊದಲನೆ ಪಿರಿಯಡ್ ಅರ್ಧಕ್ಕೆ ಹೋಗುತ್ತಿದ್ದವನು ಇವತ್ತು ಬೆಳಿಗ್ಗೆ ಪ್ರೇಯರ್ ಮುಂಚೆ ಕಿಣಿ ಕಿಣಿ ಎನ್ನಿಸುತ್ತಾ ಗೇಟಿನೊಳಕ್ಕೆ ನುಗ್ಗುತ್ತಿದ್ದಾನೆ... ಮುಖದಲ್ಲೇನೋ ಹುಮ್ಮಸ್ಸು.. ಯಾರಾದರೂ ತನ್ನನ್ನು ನೋಡುತ್ತಿದ್ದಾರಾ ಎಂದು ಪದೇ ಪದೇ ಅತ್ತಿತ್ತ ದೃಷ್ಟಿ ಹರಿಸುತ್ತಾ ಆಕೆಯನ್ನು ಹೇಗೆ ಆದಷ್ಟು ನೇರವಾಗಿ ನೋಡುತ್ತಾ ನಿಲ್ಲಲು ಸಾಧ್ಯವಾಗುತ್ತೆ ಎಂದು ಪದೇ ಪದೇ ನಿಂತಲ್ಲೇ ಭಂಗಿ ಬದಲಿಸುತ್ತಾ... ಆ ಕಡೆಗೆ ಕ್ಲಾಸಿನಲ್ಲೂ ಹಿಂದಿನ ಕಾರ್ನರ್ರೆ ಆಗಬೇಕು. ಇಲ್ಲವಾದರೆ ತಿರುಗಿ ನೋಡಿದರೆ ಲೆಕ್ಚರರ್ ಕಣ್ಣು ಬಿಡ್ತಾನಲ್ಲ.
ಆಕೆ ಎಷ್ಟು ಹೊತ್ತಿಗೆ ಕಾರಿಡಾರ್‌ನಲ್ಲಿ ಎದುರಿಗೆ ಬರ್ತಾಳೆ. ಬಸ್ಸಿನಲ್ಲಿ ಕರೆಕ್ಟಾಗಿ ಎಷ್ಟು ದೂರದಿಂದ ಬರ್ತಾಳೆ... ಯಾವ ಸ್ಟಾಪಿಗೆ ಹತ್ತಬೇಕು... ದರಿದ್ರ ಶೂ ಈ ಬಾರಿ ಬದಲಿಸಬೇಕು... ಚೆನ್ನಾಗಿ ಕಾಣುತ್ತಿಲ್ಲ ಅನ್ನೋದನ್ನ ಗಮನಿಸ್ತಾಳಾ... ? ಅವಳಿಗೂ ಹೀಗೆ ಅನ್ನಿಸುತ್ತದಾ...? ಒಂದೇ ಎರಡೇ... ಆದರೆ ವಿಪರ್ಯಾಸವೆಂದರೆ ನಮಗೆ ಅರ್ಥವಾಗುತ್ತಿರೋದು ಬರೀ ಬಾಡಿ ಲಾಂಗ್ವೇಜ್ ಮಾತ್ರ ಅನ್ನೋದು. ಅಸಲಿಗೆ ಅದಕ್ಕೆ ಪೂರಕವಾಗಿ ನಮ್ಮ ಟಿ.ವಿ. ಹಾಗೂ ಸಿನೇಮಾದ ಪ್ರಭಾವ ಹೇಗಿದೆ ಎಂದರೆ ನೈಜತೆಯಿಂದ ದೂರವಾಗಿ ಕೇವಲ ಆಕರ್ಷಣೆಯ ಸರಕನ್ನೇ ಬಿಂಬಿಸುವುದರಿಂದ ಪ್ರಬಲ ಮಾಧ್ಯಮದ ಪ್ರಭಾವವನ್ನು ಮನಸ್ಸು ಸುಲಭವಾಗಿ ನಂಬಿಕೊಂಡು ಬಿಡುತ್ತದೆ. ಅಸಲಿಗೆ ಯಾರೋ ಒಬ್ಬಳು ನಮ್ಮನ್ನು ನೋಡಿದ ಮಾತ್ರಕ್ಕೆ ಆಕೆಗೆ ನೀವು ಇಷ್ಟವಾಗಿ ಭಯಂಕರ ಪ್ರೀತಿ ಮೂಡಿ ಬಿಟ್ಟಿದೆ ಎಂದಲ್ಲ.
ಅದರ ಬದಲಾಗಿ ಅದೇಕೋ ಅದ್ಯಾವುದೋ ನಿಮ್ಮ ಪ್ಯಾಂಟಿನ ಕಲರ್ ಸು೦ದರವಾಗಿ ಕಂಡಿರಬಹುದು... ನಿಮ್ಮ ಹೇರ್ ಸ್ಟೈಲ್ ಬದಲಾಯಿಸಿದ್ದನ್ನು ಗಮನಿಸಿರಬಹುದು.. ನಿಮ್ಮ ಕೈಲಿದ್ದ ಬುಕ್ಸ್ ಮೇಲಿನ ಸ್ಟ್ಯಾಲ್ಲೋನ್ ಚಿತ್ರ... ಬೆಲ್ಟ್‌ಗೆ ಇದ್ದ ಮೆಟಾಲಿಕ್ ಬಕ್ಕಲ್‌ನ ಮಿಂಚು... ಕೂದಲಿಗೆ ಕೊಂಚವೇ ಹಚ್ಚಿಸಿರುವ ಬ್ರೌನ್ ಶೇಡ್ ... ನಿಮ್ಮ ನಡಿಗೆಯ ವಿಚಿತ್ರ ಭಂಗಿ.. ವಿಭಿನ್ನವಾಗಿ ನಿಂತುಕೊಳ್ಳುವ ಶೈಲಿ.. ಅಥವಾ ನಗೆ ತರಿಸಬಹುದಾದ ನಿಮ್ಮ ಅಗಲ ಹಸ್ತ.. ಗಿಡ್ಡ ಕೈ... ಅಗತ್ಯಕ್ಕಿಂತ ಹೆಚ್ಚು ಬಾರಿ ಬಾಚಿಕೊಳ್ಳುವ ಕೂದಲು... ಆಗಾಗ ತೆಗೆದು ನೋಡಿ ಸುಖಾಸುಮ್ಮನೆ ಆನ್ ಮಾಡಿ ಒಳಗಿರಿಸುತ್ತಿರುವ ಮೊಬೈಲು.... ರಿಂಗ್ ಟೋನ್ ಇಲ್ಲದಿದ್ದರೂ ಕಿವಿಗಿರಿಸಿಕೊಂಡು ಜೀವವಿದೆಯಾ ಎಂದು ಸುಖಾ ಸುಮ್ಮನೇ ನೋಡುವ ನಿಮ್ಮ ಎಡಬಿಡಂಗಿತನ... ಅನಾವಶ್ಯಕವಾಗಿ ಕಿರಿಯುತ್ತಿರುವ ಹಲ್ಲು... ನಿಮ್ಮ ಬ್ಯಾಗಿನ ಮೇಲಿರುವ ಹಳೆಯ ಹೇಮಾಮಾಲಿನಿಯ ಹೊಸ ಪ್ರಿಂಟು... ನೀವವಳನ್ನು ಆಗಾಗ ಕದ್ದು ಗಮನಿಸುತ್ತಿರೋದು... ಆ ಕಡೆಯವಳ ಗುಂಗುರಾದರೂ ನೀಟಾಗಿ ಕಾಣುವ ಫ್ರ೦ಟ್ ಕಟ್ ಜೊಂಪೆ ಕೂದಲು...
ಹೊರಗೆ ಎಲ್ಲೋ ನೋಡಿದರೂ ನಿಮ್ಮ ಅಕ್ಕಪಕ್ಕವೇ ಇರುವ ದೃಷ್ಟಿ... ಎಷ್ಟೆ ರಿಸರ್ವ್ ಆಗಿದ್ದರೂ ಕೊಂಚ ಸುಂದರಿ ರಸಿಕ ಹುಡುಗಿ ಸಹಜ ಮಾತುಕತೆಗೆ ಇಳಿದ ಕೂಡಲೇ ಬದ್ಲಾಗಿ ಬಿಡುವ ನಿಯತ್ತು.. ಮಾತಾಡುತ್ತಲೇ ಬದಲಾಗುವ ನಿಮ್ಮ ಬಾಡಿ ಲಾಂಗ್ವೇಜು... ಅದರಲ್ಲಿನ ಅಧೀರತೆ... ಕಂಡು ಕಾಣದಂತೆ ಹಲ್ಬಿಡುತ್ತಾ ಅಗಲಿಸುತ್ತಲೇ ಇರುವ ಬಾಯಿ... ಆಗಾಗ ಕೆರೆದುಕೊಳ್ಳುವ ಕಿವಿಯ, ಮೂಗಿನ ತುದಿಗಳು... ಕೊಂಚ ಬಿಸಿಲಿದ್ದರೂ ಹಾಕಿಕೊಂಡು ನಿಂತು ಬಿಡೋ ತಂಪು ಕನ್ನಡಕ... ಒಂದೇ ಎರಡೇ ಆಕೆಗೆ ಈ ಎಲ್ಲಾ ವಿಷಯಗಳು ಒಮ್ಮೆಲೇ ಗಮನಕ್ಕೆ ಬಂದಿರಬಹುದು ಅಥವ ಒಂದೂ ಬಾರದಿರಬಹುದು. ಆದರೆ ಖಂಡಿತಾ ಇಂತಹ ಎಷ್ಟೊ ವಿಷಯದಲ್ಲಿ ಒಂದನ್ನಾದರೂ ಆಕೆ ಗಮನಿಸಿರುತ್ತಾಳೆ. ಅದಕ್ಕಾಗಿ ಒಮ್ಮೆ ತಪ್ಪಿದರೆ ಎರಡು ಬಾರಿ ನಿಮ್ಮತ್ತ ನೋಡಿರಬಹುದು. ಆದರೆ ಹಾಗೆ ನೋಡಿದ ಮಾತ್ರಕ್ಕೆ ನಾವು ಮನದಲ್ಲಿ ಮಂಡಿಗೆ ತಿನ್ನಲಾರಂಭಿಸಿಬಿಡುತ್ತೇವೆ. ತೀರ ಆಘಾತಕಾರಿ ಸಂಗತಿ ಎಂದರೆ ಸಂಜೆಯ ಹೊತ್ತಿಗೆ ಕೊಂಚ ಮಾತ್ರ ಗುಂಡು ಹಾಕಿಕೊಂಡೋ ಅಥವಾ ಅದಿಲ್ಲದೆಯೋ " ಸಖತ್ತಾಗಿ ಲೈನ್ ಕೊಡ್ತಾಳಮ್ಮ" ಎಂದು ಆ ಕಡೆಯವನು ಆಡಿಕೊಳ್ಳುತ್ತಿದ್ದರೆ, ಇಲ್ಲಿನ ಪಕ್ಕದ ಊರಿನಲ್ಲೊಮ್ಮೆ " ಆದ್ ಯಾ ನಮನಿ ನೋಡ್ತು ಮಾರಾಯ., ಯಂಗಂತೂ ಹ್ಯಾಂಗ್ಯಾಂಗೋ ಆಗ್ ಹೋಯ್ತಾ... ಸಾಯಲಿ ನಿನ್ನೆ ಸರ್ಯಾಗಿ ಮನಿಕಳಾಕೂ ಆಗ್ಲಿಲಾ ಹೇಳಿ... ಎಂತಾ ಸ್ಟ್ರಾಂಗು ಅದರ ಕಣ್ಣು ಹೇಳಿ... " ಎಂದು ಮಾಣಿ ತನ್ನದೇ ಜೊತೆಗಿನವನ ಕಿವಿ ಕಚ್ಚುತ್ತಿರುತ್ತದೆ.
ಅಸಲಿಗೆ ಇವನ ಅದೇ ನೇತಾಡುವ ಲೂಸು ಪ್ಯಾಂಟು, ಸೊಂಟದ ಮೇಲೆ ನಿಲ್ಲದೇ ಒದ್ದಾಡುವ ದೊಗಳೆ ಜೀನ್ಸು... ಅದಕ್ಕೆ ಹಲ್ಲು ಕಚ್ಚಿ ನೇಣು ಹಾಕಿದ೦ತೆ ಬಿಗಿದ ಅವನ ಕೈಗಿಂತ ದಪ್ಪದ ಲೆದರ್ ಬೆಲ್ಟು... ಮತ್ತು ಹೊಟ್ಟೆಗಿಲ್ಲದವರಂತಹ ಬಡಕಲು ಬೆನ್ನು, ಆಕೆಯನ್ನು ಅದಿನ್ಯಾವ ಪರಿ ಆಕರ್ಷಿಸುತ್ತದೋ ಆ ಮಾಣಿಯೇ ವಿವರಿಸಬೇಕು. ಅಸಲಿಗೆ ಇದೇ ಪುರುಷ ಪುಂಗವ ತನಗೇ ಗೊತ್ತಿಲ್ಲದಂತೆ ನಿನ್ನೆಯ ಬದಲಾಯಿಸದ ಅ೦ಡರ್‌ವೇರ್ ಉಂಟು ಮಾಡುತ್ತಿದ್ದ ಕಿರ್ಕಿರಿಗೆ ಅದು ಬಸ್ ಸ್ಟ್ಯಾಂಡೋ... ಮಾರ್ಕೇಟ್ಟಾ... ಶಾಪಿಂಗ್ ಕಾಂಪ್ಲೆಕ್ಸಾ... ನೋಡದೆ ಎಲ್ಲರೆದುರಲ್ಲೇ ಹಿಂಭಾಗ, ಮುಂಭಾಗ ಕೆರೆದುಕೊಳ್ಳುತ್ತಾ ನಿಂತಿದ್ದಾಗಲೂ ನೋಡಿದ ಹೆಂಗಸರಷ್ಟೆ ಅಲ್ಲ, ಗಂಡಸರೂ ಕೂಡಾ " ಅದ್ನೋಡು ಅದ್ಯಾವ ರೀತಿ ಗಿಟಾರ್ ಬಾರಿಸ್ತಾನೆ... ಸಾಯಲಿ ಸರ್ಯಾಗಿ ಸ್ನಾನ ಮಾಡೋಕು ಬರಲ್ಲವಾ " ಎಂದು ಹಲ್ಲು ಕಚ್ಚುತ್ತಿದ್ದರೆ, ಪಕ್ಕದ ರಸ್ತೆ ದಾಟುತ್ತಿದ್ದ ಆಂಟಿಯನ್ನು ನೋಡುತ್ತಾ ನಿಂತು ಬಿಡುವ ನಮ್ಮ ಕಂಠೀರವನಿಗೆ ಅರ್ಥವೇ ಆಗುವುದಿಲ್ಲ. ಬದಲಿಗೆ ಕೈ ಇನ್ನೊಮ್ಮೆ ಸಂದುಗಳತ್ತ ಬಿಡು ಬೀಸಾಗಿ ಸರಿಸುತ್ತಲೇ ನಿಂತಿರುತ್ತಾನೆ.
ಯಾಕೆ ಹೀಗೆ ಯಾವುದೇ ಪುರುಷರು, ಹುಡುಗಿಯರು ಅಥವಾ ಹೆಣ್ಣೊಬ್ಬಳು ಒಂದೆರಡು ಬಾರಿ ಹೆಚ್ಚಾಗಿಯೇ ನೋಡಿದಳೆಂದರೆ ಅದರಲ್ಲಿ ಕಾಮದ ವಾಸನೆಯನ್ನೇ ಹುಡುಕುತ್ತಾರೆ... ? ಯಾಕೆಂದರೆ ಅದೊಂದು ರೀತಿಯಲ್ಲಿ ನಮ್ಮ ಮನಸ್ಸು ಹಾಗೇ ಯೋಚಿಸುತ್ತಾದ್ದರಿಂದಾಗಿನಾ ಅಥವಾ ಹಾಗೊಂದು ಆಸೆ ಹೊಕ್ಕುಳಿನಾಳದಿಂದ ಹುಟ್ಟಿಕೊಂಡು ಬಿಡುತ್ತದಾ ? ಅದನ್ನು ಹಾಗೆ ಮ೦ಡಿಗೆ ತಿನ್ನುವವರೇ ಹೇಳಬೇಕು. ಅಸಲಿಗೆ ಹಾಗೆ ನಾವು ನೋಡುವ ಮಟ್ಟಕ್ಕೆ ಈ ದೇಶದ ಹೆಣ್ಣು ಮಕ್ಕಳೇನಾದರೂ ಇಳಿದು ಬಿಟ್ಟಿದ್ದರೆ ನಾವು ಇಷ್ಟೊತ್ತಿಗೆ ನೈತಿಕವಾಗಿ ಅಷ್ಟೇ ಅಲ್ಲ ಸರ್ವತೋಮುಖವಾಗಿ ದಿವಾಳಿತನದ ಅಂಚಿನಲ್ಲಿ ನಿಂತಿರುತ್ತಿದ್ದೆವು. ಅಕಸ್ಮಾತಾಗಿ ಎಲ್ಲಾ ರಂಗದಲ್ಲೂ ಇವತ್ತು ಪುರುಷ ನಿಂತು ಸಾಧಿಸುತ್ತಿದ್ದಾನೆಂದರೆ ಎಲ್ಲಾ ಕಡೆಯಲ್ಲೂ ಅಷ್ಟೆ ಬೆ೦ಗಾವಲಾಗಿ ಬೆಂಬಲವಾಗಿ ನಿಂತು ಬಿಟ್ಟಿರೋ ಹೆಣ್ಣೇ ಕಾರಣ. ಜೊತೆಗೆ ನಮ್ಮಷ್ಟು ಕಚ್ಚೆ ಹರುಕತನವಿನ್ನೂ ಈ ನಮ್ಮ ದೇಶದ ಹೆಣ್ಣುಗಳಿಗೆ ಕಾಡಿಲ್ಲ ಎನ್ನುವುದೂ ಕೂಡಾ ನಮ್ಮ ನಮ್ಮ ಓಡುವ, ನೋಡುವ ನೋಟಗಳಿಗೆ ಅರ್ಥವಾದರೆ ನಮ್ಮ ಸರ್ವತೋಮುಖ ಪ್ರಖರತೆ ಇನ್ನಷ್ಟು ಹೆಚ್ಚಾದೀತು... ! ಇನ್ನು ಮುಂದೆ ನೋಡುವಾಗ ಹುಶಾರು.
No comments:
Post a Comment